දොළකඳ වැව ප්‍රතිසංස්කරණයට පියවර
දෙහිඅත්තකණ්ඩිය නගරය ආසන්නයේ පිහිටි ගොවි පවුල් 450ක් පමණ පෝෂණය වන දොළකඳ වැව ප්‍රතිසංස්කරණයට පියවර ගෙන තිබෙනවා.
වික්ටෝරියා ජලාශය ඉදිකිරීමෙන් ඉඩම් අහිමි වූ ගොවිපබොල් 450ක් පදිංචි වී සිටින දෙහිඅත්තකණ්ඩිය නගරය ආසන්නයේ ඇති මෙම වැව මේ වනවිට ආක්‍රමණික ශාකවලින් පිරී ප්‍රදේශයේ ජනතාවගේ ප්‍රයෝජනයට ගත නොහැකි තත්ත්වයකට පත්ව ඇති බව සඳහන්.
1990 වසරේදී පදිංචි කරවූ මෙම ගොවි පවුල් සඳහා බීමට සහ යල මහා ගොවිතැන් කටයුතුද මෙම වැවේ වතුර මගින් කළ බවයි ගොවීන් සඳහන් කර සිටියේ.
වසර තිස්පහකින් පමණ ප්‍රතිසංස්කරණයක් නොකළ මෙම වැව නැවත යථා තත්ත්වයට පත්කර දෙන ලෙස එම ප්‍රදේශයේ ජීවත්වන ගොවි පවුල් මහවැලි සී කලාපයේ පැවැත් වූ පුනරුද සතියේදී මහවැලි නේවාසික ව්‍යාපාර කළමනාකරු එච්.එම්.ආර් හේරත් මහතාගෙන් ඉල්ලා තිබෙනවා.
මේ පිළිබඳව සලකා බැලූ නේවාසික කළමනාකරු මෙම වැවෙන් පෝෂණය වන ගොවි පවුල් 450 දෙනාට නැවත යල මහ දෙකන්නය සහ ගොඩවගාව කිරීම සඳහා ගොවියන්ගේ පූර්ණ ශ්‍රමදායකත්වයෙන් සහ මහවැලි ඉංජිනේරුවන්ගේ අධීක්ෂණය යටතේ මහවැලියට අයත් යන්ත්‍රෝපකරණ භාවිතා කර නැවත ප්‍රතිසංස්කරණය කර දීමට එකඟතාවය පළ කර ඇති බව සඳහන්.
ගොවියන්ගේ පූර්ණ ශ්‍රමදායකත්වයෙන් සහ මහවැලි අධිකාරියේ යන්ත්‍රෝපකරණ භාවිතා කරමින් මෙම ප්‍රතිසංස්කරණ කටයුතු සිදුකිරීම මගින් රජයට අමතර මුදලක් වැය නොවන බව මෙහිදී නේවාසික කළමනාකරු එච්.එම්.ආර් හේරත් මහතා ප්‍රකාශ කර තිබෙනවා.