නෞකාවක සිදුවූ පිපිරීමකින් නාවිකයන් තිදෙනෙකු ජීවිතක්ෂයට

මුම්බායි හි නාවික තටාකාංගනයක නෞකාවක සිදුවූ පිපිරීමකින් ඉන්දීය නාවික හමුදා සාමාජිකයින් තිදෙනෙකු මිය ගිය බව එරට නාවික හමුදාව පවසනවා.

ඉන්දීය නාවික හමුදාවට අයත් INS රන්විර් නමැති නෞකාවේ මෙම පිපිරීම සිදුව තිබෙන බවයි පැවසෙන්නේ.

එරට ආරක්ෂක අමාත්‍යාංශය නිවේදනයක් නිකුත් කරමින් INS රන්විර් නෞකාවේ අභ්‍යන්තර මැදිරියක සිදුවූ පිපිරීමකින් නාවික සෙබළුන් තිදෙනෙකු තුවාල ලබා මිය ගිය බව තහවුරු කර තිබෙනවා.

විශාල ද්‍රව්‍යමය හානියක් වාර්තා වී නොමැති බව ද එහි වැඩිදුරටත් සඳහන් වනවා.

පිපිරුම පස්වරු 4.30 ට පමණ සිදුවී ඇති අතර ආයුධ හෝ පතොරම් මෙම පිපිරීමට කිසිදු සම්බන්ධයක් නොමැති බවයි පැවසෙන්නේ

හේතුව සොයා බැලීමට පරීක්ෂණ මණ්ඩලයකට නියෝග කර ඇති අතර නිවේදනයක් නිකුත් කරමින් ඉන්දීය නාවික හමුදාව  INS රන්විර් නෞකාවේ සිදුවූ අවාසනාවන්ත සිදුවීමෙන් සිදුවූ තුවාල හේතුවෙන් මියගිය ක්‍රිෂාන් කුමාර්, සුරින්දර් කුමාර් , සහ AK සිංග්ගේ පවුල්වලට ශෝකය පළ කර සිටිනවා.