මාතර ගංවතුර වළක්වන්න ඇති කඩිනම් විසඳුම් ගැන සාකච්ඡාවක්
මාතර නිල්වලා ලවණ බාධකය ප්‍රදේශයේ ගංවතුර තත්ත්වයක් උද්ගතවීම කෙරෙහි බලපාන හේතු සොයාබලා කඩිනමින් විසඳුම් ලබාදෙන ලෙස ජනපති ලේකම් ආචාර්ය නන්දික සනත් කුමානායක මහතා විසින් නිලධාරීන්ට උපදෙස් ලබා දී තිබෙනවා.
ජනාධිපති ලේකම් කාර්යාලයේදී පැවති සාකච්ඡාවකදී ජනාධිපති ලේකම්වරයා එම උපදෙස් ලබාදී ඇති අතර මාතර නිල්වලා ගඟේ ඉදිකර තිබෙන ලවණ බාධකය ගංවතුර තත්ත්වය ඉහළ යාමට හේතු වී ඇති බවට මෙන්ම කුඹුරු වෙත කරදිය පැමිණීම හේතුවෙන් වගා හානි වන බවට එහිදී කරුණු ඉදිරිපත් වී ඇති බව සඳහන්.
ඉදිකර ඇති ලවණ බාධකය හේතුවෙන් ගංවතුර තත්ත්වයක් මෙන්ම වගා බිම්වලට ලවණ ජලය පැමිණීම සිදුවන්නේ ද යන්න සඳහා ස්ථීර විසඳුම් ලබාදීම විධිමත් අධ්‍යනයකින් අනතුරුව සිදුකළ යුතු බවට යෝජනා වී තිබෙනවා.
අදාළ අධ්‍යයනය සිදුකර විසඳුම් යෝජනා ඉදිරිපත් කිරීමට පේරාදෙණිය විශ්වවිද්‍යාලයේ ඉංජිනේරු අංශයේ සහාය ලබාගැනීමට කරන ලද යෝජනාවට ජනාධිපති ලේකම්වරයා මෙහිදී සිය එකඟතාව ලබා දුන් බවයි ජනාධිපති මාධ්‍ය අංශය සඳහන් කළේ.
මාතර දිස්ත්‍රික්කයේ ගංවතුර පාලනය කිරීම සඳහා විධිමත් වැඩපිළිවෙළක් ක්‍රියාත්මක කළ යුතු අතර එම වැඩසටහන ක්‍රියාත්මක කිරීමට වාරිමාර්ග හා ජල සම්පාදන මණ්ඩලය ඒකාබද්ධව කටයුතු කළ යුතු බවටද ජනාධිපති ලේකම්වරයා එහිදී ප්‍රකාශ කර තිබෙනවා.