මින්නේරිය සහ කවුඩුලු ජාතික වනෝද්‍යානයේ සැරිසරන වන අලින්ට සංචාරක මඟ පෙන්වන්ගෙන් හිරිහැර
සංචාරක සමය ඇරඹීමත් සමඟ මින්නේරි සහ කවුඩුල්ල ජාතික වනෝද්‍යාන නැරඹීමට දිනකට විශාල සංචාරකයන් ප්‍රමාණයක් පැමිණෙන අතර මෙම සංචාරකයන් රැගෙන යන සපාරි ජීප් රථවල මග පෙන්වන්නන් අතර ඇතිවී තිබෙන තරගකාරීත්වය නිසා වන අලින් ගමන් කරන මාර්ගයන්ද අවහිරවන ලෙස ඔවුන්ගේ ජීප්රථ හරස් කරමින් සංචාරකයන්ට වන අලි පෙන්වීමට පෙළඹීී සිටීම අනතුරුදායක වී ඇතැයි වාර්තා වනවා.
අප වාර්තාකරු පවසන්නේ විශාල පිරිසක් එම කර්මාන්තයට යොමු වීමත් සමඟ ජාතික වනෝද්‍යාන නැරඹීමට දිනකට විශාල සංචාරකයන් ප්‍රමාණයක් රැගෙනයන ඔවුන් කිසිදු දැනුමක් හෝ පුහුණුවක් නැතිව වන අලින් ගමන් කරන මාර්ගයන්ද අවහිරවන ලෙස ඔවුන්ගේ ජීප්රථ හරස් කරමින් සංචාරකයන්ට වන අලි පෙන්වීමට පෙළඹීී සිටීම මේ දිනවල සුලභව දැකිය හැකි බවයි.
මේ තුළින් වන අලින්ගේ භූමිය තුළදීම එම සතුන්ට බරපතළ ලෙස පීඩාකාරී වන අයුරින් හැසිරීම එම සතුන්ගේ නිදහසට දැඩි ලෙස බාධා එල්ල වෙමින් පවතින බව වාර්තා වනවා.
මෙම තත්ත්වය මත සංචාරකයන්ට වන අලි නැරඹීමට ඇති අවස්ථාද හීන වී ගොස් ඇති අතර වන අලින් ඔවුන්ගේ ආහාර ගැනීමේ අව ස්ථාවද අතහැර වනයට ගමන් කිරීමට කටයුතු කරන බව සදහන්.
නිදැල්ලේ ආහාර ගනිමින් ගැවසෙන වන අලින්ට ඔවුන්ගේ භූමිය නිදහසේ සැරිසැරීමට අවස්ථාව උදා කර දෙන ලෙස පරිසරවේදීන් පවසනවා.
වසර ගණනාවක් තිස්සේ සංචාරක මඟ පෙන්වන ලෙස කටයුතු කරන පිරිසක් පවසන්නේ විශේෂයෙන්ම තරුණ සංචාරක මග පෙන්වන්නන් නිසි පුහුණුවක් ලබා දී ජාතික වනෝද්‍යාන තුළ වන සතුන් හැසිරෙන ආකාරය පිළිබඳ දැනුවත් කළ යුතු බවයි.
