යෝෂිතගේ සහ ඩේසි ආච්චිගේ නඩුව සැප්. 22 ට කල් යයි
රුපියල් මිලියන 73කට ආසන්න වත්කම් අයථා ලෙස උපයාගැනීම සම්බන්ධයෙන් චෝදනා ලබා සිටින හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ සහ ඔහුගේ මිත්තනිය වන ඩේසි ෆොරස්ට් යන අයට නීතිපතිවරයා විසින් ගොනුකර තිබෙන නඩුවක් යළි සැප්තැම්බර් මස 22 වැනිදා කැඳවන ලෙස කොළඹ මහාධිකරණ විනිසුරු සහන් මාපා බණ්ඩාර මහතා අද(28) නියෝග කළා.
නඩුව අද කොළඹ මහාධිකරණය හමුවේ කැඳවනු ලැබු අවස්ථාවේ දී විත්තිකරුවන් අධිකරණයේ පෙනී සිටියා.
එහිදී යෝෂිත රාජපක්ෂ වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් මහතා අධිකරණය හමුවේ කරුණු දක්වමින් මෙම නඩුවේ සාක්ෂියක් ලෙස වෝහාරික විගණන වාර්තාවක් ඉදිරිපත් කර ඇති අතර එම විගණන වාර්තාව සකස් කිරීම සඳහා ඊමේල් පණිවුඩ අඩංගු සීඩී තැටි 26ක්, පෙන්ඩ්‍රයිව් 08ක්, හාඩ්ඩ්‍රයිව් 1ක්, ලැප්ටොප් 1ක් සහ CPU එකක් සම්බන්ධයෙන් ප්‍රවේශ වී පරීක්ෂා කිරීමට අවසර ලබාදෙන ලෙස අධිකරණයෙන් ඉල්ලා සිටියා.
එම ඉල්ලීමට තමන් විරුද්ධ නොවන බව රජයේ නීතිඥවරයා සඳහන් කළා.
ඒ අනුව මහාධිකරණ විනිසුරුවරයා නියෝග කළේ අදාළ පැමිණිල්ල නැවතත් සැප්තැම්බර් මස 22 වැනිදා කැඳවීමටයි.
රුපියල් මිලියන 73 කට ආසන්න වත්කම් හා දේපල අයථා ලෙස උපයා ගත් බවට චෝදනා කරමින් යෝෂිත රාජපක්ෂ සහ ඩේසි ෆොරස්ට් යන අයට විරුද්ධව නීතිපතිවරයා විසින් මුදල් විශුද්ධිකරණය වැළැක්වීමේ පනත යටතේ මෙම නඩුව ගොනුකර තිබෙනවා.