රාජ්‍ය තාන්ත්‍රිකභාවය ආයුධ නිහඬ කරත්වා! යැයි පාප්වහන්සේ ගෙන් ප්‍රාර්ථනයක්
යුද්ධය ගැටළු විසඳන්නේ නැත; ඊට පටහැනිව, යුද්ධය ඒවා විශාල කර ජනතාවගේ ඉතිහාසය මත ගැඹුරු තුවාල ඇති කරනවා. ඒවා සුව වීමට පරම්පරා ගණනාවක් ගත වනු ඇතැයි ශුද්ධ වූ 14 වැනි ලියෝ පාප්වහන්සේ පවසනවා.
උන්වහන්සේ සිය x ගිනුමේ දක්වා ඇත්තේ කිසිදු සන්නද්ධ ජයග්‍රහණයකට මව්වරුන්ගේ වේදනාව, දරුවන් කෙරෙහි ඇති බිය හෝ සොරකම් කරන ලද අනාගතයට වන්දි ගෙවිය නොහැකි බවයි.
පාප්වහන්සේ ප්‍රාර්ථනය කරන්නේ රාජ්‍ය තාන්ත්‍රිකභාවය ආයුධ නිහඬ කරත්වා! යන්නයි.
ජාතීන් තම අනාගතය ප්‍රචණ්ඩත්වයෙන් සහ ලේ තැවරුණු ගැටුම්වලින් නොව, සාමයේ ක්‍රියාවලින් සැලසුම් කරත්වා යැයි උන්වහන්සේ තවදුරටත් ප්‍රාර්තනා කරනවා.
මේ අතර ඉරාන න්‍යෂ්ටික මධ්‍යස්ථාන වෙත එක්සත් ජනපදය ඊයේ රාත්‍රියේ එල්ල කළ ගුවන් ප්‍රහාරවලින් පසුව, රුසියානු ජනාධිපති ව්ලැඩිමීර් පුටින් සමඟ ඉහළ මට්ටමේ සාකච්ඡා සඳහා මොස්කව් බලා යන බව ඉරාන විදේශ අමාත්‍ය අබ්බාස් අරග්චි අද නිවේදනය කළා.
ඉස්තාන්බුල්හි පැවති ඉස්ලාමීය සහයෝගීතා සංවිධානයේ (OIC) සමුළුවට සමගාමීව පැවති මාධ්‍ය හමුවකදී අදහස් දක්වමින් ඉරාන විදේශ අමාත්‍යවරයා පැවසුවේ ජනාධිපති පුටින් සමඟ සාකච්ඡා හෙට (23) උදෑසන සිදුවන බවයි.
“රුසියාව ඉරානයේ මිතුරෙකි, අපි සැමවිටම එකිනෙකා සමඟ සාකච්ඡා කරමු,” යැයි අරග්චි වාර්තාකරුවන්ට පැවසුවා.
“හෙට උදෑසන රුසියානු ජනාධිපතිවරයා සමඟ බැරෑරුම් උපදේශන සඳහා මම මොස්කව් වෙත යනවා.” අබ්බාස් අරග්චි වැඩි දුරටත් සදහන් කළා.
ඉරාන විදේශ අමාත්‍යවරයා මෙම ප්‍රහාර ජාත්‍යන්තර නීතිය දැඩි ලෙස උල්ලංඝනය කිරීමක් ලෙස හෙළා දුටු අතර, ඔවුන් “න්‍යෂ්ටික මධ්‍යස්ථානවලට පහර දීමෙන් ඉතා විශාල රතු රේඛාවක් තරණය කර ඇති” බව පැවසුවා.
මොස්කව්හිදී, හිටපු රුසියානු ජනාධිපති සහ රුසියානු ආරක්ෂක කවුන්සිලයේ නියෝජ්‍ය සභාපති දිමිත්‍රි මෙඩ්විඩෙව්, ජනාධිපති ට්‍රම්ප්ට එරෙහිව ඔහු එක්සත් ජනපදය මැද පෙරදිග නව යුද්ධයකට ඇද දැමූ බවට චෝදනා කළේය. මෙඩ්විඩෙව් ටෙලිග්‍රෑම් හි ඔහුගේ ප්‍රතිචාරය ප්‍රකාශයට පත් කරමින්, “සාම සාදන්නෙකු ලෙස පැමිණි ට්‍රම්ප්, එක්සත් ජනපදය සඳහා නව යුද්ධයක් ආරම්භ කර ඇත” යනුවෙන් කෙලින්ම පැවසීය.
හිටපු රුසියානු ජනාධිපතිවරයා එක්සත් ජනපද මෙහෙයුමේ ඵලදායීතාවය පිළිබඳව ප්‍රශ්න කරමින් කියා සිටියේ එය කිසිදු සැලකිය යුතු මිලිටරි අරමුණු සාක්ෂාත් කර ගැනීමට අපොහොසත් වී ඇති බවයි. “න්‍යෂ්ටික ඉන්ධන චක්‍රයේ තීරණාත්මක යටිතල පහසුකම්වලට කිසිදු බලපෑමක් සිදුවී නොමැති බව හෝ සුළු හානියක් පමණක් සිදුවී ඇති බව පෙනේ,” ඔහු ලිවීය. “න්‍යෂ්ටික ද්‍රව්‍ය පොහොසත් කිරීම – දැන් අපට එය කෙලින්ම පැවසිය හැකිය, අනාගත න්‍යෂ්ටික අවි නිෂ්පාදනය – දිගටම පවතිනු ඇත.”
“රටවල් ගණනාවක් ඉරානයට තමන්ගේම න්‍යෂ්ටික යුධ හිස් සෘජුවම සැපයීමට සූදානම්” බව මෙඩ්විඩෙව් මහතා ප්‍රකාශ කළේය. ඔහු සඳහන් කරන්නේ කුමන ජාතීන්ද යන්න ඔහු හඳුනා ගත්තේ නැත.
