දේශපාලන සංක්‍රාන්ති සමයක සාමය හා ස්ථාවරත්වය යළි ස්ථාපිත කරන්නැයි චීනය සිරියාවෙන් ඉල්ලයි
සිරියාව තුළ දේශපාලනමය වශයෙන් සංක්‍රාන්ති සමයක් පවතින බැවින් සාමය හා ස්ථාවරත්වය යළි ස්ථාපිත කිරීමට කටයුතු කරන ලෙස චීනය සිරියාවෙන් ඉල්ලා සිටිනවා.
සිරියාවේ පවතින අර්බුදය සම්බන්ධයෙන් එක්සත් ජාතීන්ගේ ආරක්ෂක මණ්ඩලයේ පැවති විවෘත රැස්වීමක දී එක්සත් ජාතීන්ගේ චීන ස්ථාවර නියෝජිත Fu Cong මහතා මේ බව සඳහන් කළා.
කිසිදු වගවිභාගයකින් තොරව සිරියාවේ වෙරළබඩ ප්‍රදේශයේ සිවිල් වැසියන් ඝාතනය කිරීම් සිදුව ඇති බවත් ඒ සම්බන්ධයෙන් මාසයක් ඇතුළත ස්වාධීන විමර්ශනයක් ආරම්භ කර වගකිවයුත්තන්ට දඬුවම් ලබා දෙන බවත් සිරියානු අන්තර්වාර රජය ප්‍රකාශ කර ඇති බවයි ඔහු මෙහිදී සඳහන් කර ඇත්තේ.
ඒ අනුව සිරියානු අන්තර්වාර රජය එම කටයුතු විනිවිදභාවයෙන් මෙන්ම වගකීමෙන් යුතුව ක්‍රියාත්මක කරනු ඇතැයි චීනය අපේක්ෂා කරන බවද Fu Cong මහතා එහිදී අවධාරණය කර තිබෙනවා.
එමෙන්ම වත්මන් සිරියානු රජය සිය පොරොන්දුව ඒ අයුරින් ඉටු කරමින් එක්සත් ජාතීන්ගේ ආරක්ෂක මණ්ඩලයේ අංක 2254 දරන යෝජනාවේ මූලධර්මවල උපදෙස් යටතේ සිරියාවේ අදාළ පාර්ශ්ව සමග පූර්ණ සංවාද හා සම්බන්ධීකරණය ක්‍රියාත්මක කිරීමට ද චීනය අපේක්ෂා කරන බවත් චීන ස්ථාවර නියෝජිත Fu Cong මහතා ප්‍රකාශ කර ඇති බව සඳහන්.
එමෙන්ම සිරියානු අර්බුදය පිළිබඳ එක්සත් ජාතීන්ගේ විශේෂ නියෝජිත Geir Pedersen මහතාගේ වැඩකටයුතුවලට අදාළ පාර්ශ්වයන්ගේ සහාය හිමි විය යුතු බවත් අරාබි රාජ්‍ය ලීගයට සිරියානු දේශපාලන ක්‍රියාදාමය තුළ වඩාත් වැඩි කාර්යභාරයක් ඉටු කළ හැකි බවත් Fu Cong මහතා මෙහිදී පෙන්වා දී තිබෙනවා.
තවද ඊශ්‍රායලය සිරියාවට එරෙහිව එල්ල කරන ගුවන් ප්‍රහාර චීනය දැඩිව හෙළා දකින අතර ඊශ්‍රායලය කඩිනමින් සිරියානු භූමියෙන් ඉවත් කළ යුතු බවටයි ඔහු අවධාරණය කර ඇත්තේ.