මියන්මාරයේ ඛේදවාචකය වෙනුවෙන් විපක්ෂ නායක ශෝකය පළ කරයි
මියන්මාරයේ සිදුවූ දැවැන්ත භූමිකම්පාව හේතු කොටගෙන දහස් ගණනකගේ ජීවිත මෙන්ම දේපළ අහිමි වී තිබීම සම්බන්ධයෙන් ශෝකය පළ කිරීමට විපක්ෂ නායක සජිත් ප්‍රේමදාස මහතා අද (01) මියන්මාර හා තායිලන්ත තානාපති කාර්යාලය වෙත පැමිණ තිබුණා.
එහි දී මෙරට මියන්මාර සහ තායිලන්ත තානාපති ප්‍රමුඛ දූත පිරිස හමුවී සිය ශෝකය පළ කළ අතර රටක් ලෙස මියන්මාරය සහ තායිලන්තය වෙනුවෙන් කළ හැකි උපරිම සහයෝගය ලබා දෙන බව ද විපක්ෂ නායකවරයා පවසා තිබෙනවා.
අප රටේ සම්බුද්ධ ශාසනය, බෞද්ධ ශිෂ්ඨාචාරය සමග සමීප සම්බන්ධතාවක් මියන්මාරයට ඇති නිසා වගකිවයුතු බෞද්ධයින් ලෙස ආගමට සහ දහමට අනුව විපතට පත් ජනතාවට කළ හැකි උපරිම උදව් උපකාර කරන බවත්, ධනවත් රටවල් සේම ජාත්‍යන්තර ප්‍රජාවද මියන්මාරයේ ජනතාව වෙනුවෙන් ලබා දිය හැකි ඉහළම සහන ලබා දෙන ලෙස තමන් ඉල්ලා සිටින බව, විපක්ෂ නායකවරයා එහිදී වැඩිදුරටත් ප්‍රකාශ කර තිබෙනවා.