පොලීසිය ඇන්දූ පොලිස් නොවන පොලිස් නෝනා
උප පරීක්ෂකවරියක් ලෙස වසර දෙකකට ආසන්න කාලයක් වෙස්වලා ගනිමින්, පුහුණු සැසිවලට සහභාගී වෙමින්, නිල නිල ඇඳුම් ඇඳගෙන, ජ්‍යෙෂ්ඨ පොලිස් නිලධාරීන් සමඟ ඡායාරූපවලට පවා පෙනී සිටි කාන්තාවක් අත්අඩංගුවට පත්ව තිබෙනවා.
ඒ අසල් වැසි ඉන්දියාවේ, රාජස්ථාන් පොලිස් ඇකඩමියට සම්බන්ධවයි මෙම තරුණිය කටයුතු කර ඇත්තේ.
රාජස්ථාන් පොලිස් ඇකඩමිය ප්‍රකාශ කර ඇත්තේ තම ඇකඩමියේ පන්ති කාමර වලට ඇතුලුවීම සහ ගෘහස්ථ පුහුණු පහසුකම් වෙත ළඟා වීමට ඇයට නොහැකි බවයි.
කෙසේ වෙතත් මෝනා බුගාලියා නොහොත් මූලි ලෙස හඳුනාගෙන ඇති විත්තිකාරිය මේ සතියේ මුලදී රාජස්ථානයේ සිකාර් දිස්ත්‍රික්කයේදී අත්අඩංගුවට පත්ව තිබෙනවා.
ඇය පොලීසිය මගහරිමින් සිට ඇත්තේ 2023 සිට බව ඉන්දීය මාධ්‍ය වාර්තා කළා.
පොලිසියට අනුව, බුගාලියා උප පොලිස් පරීක්ෂක බඳවා ගැනීමේ විභාගය සමත් නොවී ප්‍රාන්තයේ ප්‍රමුඛතම පොලිස් පුහුණු ආයතනයට සාර්ථකව ඇතුළු වී තිබෙනවා.
ඇය අත්අඩංගුවට ගැනීමෙන් පසු, පොලිසිය බුගාලියා හා සම්බන්ධ කුලියට ගත් කාමරයක් පරීක්ෂා කර රුපියල් ලක්ෂ 7 ක මුදල්, වෙනම පොලිස් නිල ඇඳුම් තුනක් සහ රාජස්ථාන් පොලිස් ඇකඩමියේ විභාග ප්‍රශ්න පත්‍ර සොයා ගැනීමට සමත් වුණා.
ඇගේ ව්‍යාජ අනන්‍යතාවය සහ පසුබිම සනාථ කිරීම සඳහා භාවිතා කරන ලද ව්‍යාජ ලියකියවිලි ද සොයා ගෙන තිබෙනවා.
පොලිසියට අනුව, බුගාලියා රාජස්ථාන්හි, නාගෝර් දිස්ත්‍රික්කයේ නිම්බා කේ බාස් නම් ගම්මානයේ තැනැත්තියක්.
ඇගේ පියා ට්‍රක් රථ රියදුරෙක්.
නිල වාර්තාවලින් සනාථ ඇත්තේ ඇය රාජස්ථාන් උප පොලිස් පරීක්ෂක බඳවා ගැනීමේ විභාගය කිසි විටෙකත් සමත් නොවූ බවයි.
2021 වසරේ දී සුදුසුකම් ලැබීමට අපොහොසත් වීමෙන් පසු, ඇය “මූලි දේවි” නමින් ව්‍යාජ ලේඛන නිර්මාණය කර, ඇය උප පරීක්ෂකවරියක් ලෙස තෝරාගෙන ඇති බවට සමාජ මාධ්‍යවල පණිවිඩයක් ප්‍රචාරය කර තිබෙනවා.
පසුව, ඇය රාජස්ථාන් පොලිස් ඇකඩමියේ පෙනීසිට ඇත්තේ උප පරීක්ෂක බඳවා ගැනීම් සඳහා පමණක් සකස් කරන ලද WhatsApp කණ්ඩායමකට සම්බන්ධ වී, ක්‍රීඩා කෝටාව හරහා ඇතුළත් වූ පෙර කණ්ඩායමක අපේක්ෂකයෙකුගේ මුවාවෙන්.
ඉන්දීය මාධ්‍ය පවසන්නේ වසර දෙකකට ආසන්න කාලයක්, බුගාලියා සම්පූර්ණ නිල ඇඳුමින් සැරසී රාජස්තාන් පොලිස් ඇකඩමියේ පෙළපාළි භූමියේ නිතිපතා පෙනී සිටි බවයි.
ඇය එළිමහන් අභ්‍යාසවලට සහභාගී තිබෙනවා.
ශ්‍රේණිගත කිරීමේ නිලධාරීන් සමඟ ඡායාරූප සඳහා පෙනී සිට ඇති ඇය, සමාජ මාධ්‍යවල අභිප්‍රේරණ අන්තර්ගතයන් සහ පෝස්ට් පළ කර තිබෙනවා.
ඒ සියල්ල සේවය කරන නිලධාරිනියක් ලෙස පෙනී සිටියදී සිදුකළ ක්‍රියාකාරකම්.
එවැනි එක් අවස්ථාවකදී, ඇය සම්පූර්ණ පොලිස් නිල ඇඳුමින් සැරසී ප්‍රසිද්ධ වේදිකාවක සිට වෘත්තීය දැනුවත් කිරීමේ දේශන‍යක් ද පවත්වා තිබෙනවා.
තරුණ අපේක්ෂකයින්ට අභිප්‍රේරණ උපදෙස් ලබා දෙමින් ඇය රාජස්තාන් පොලිස් ඇකඩමියේ නිලධාරීන් ඇතුළු ජ්‍යෙෂ්ඨ පොලිස් නිලධාරීන් අසල සිටගෙන සිටින බව ඡායාරූප පළ කිරීම ද කිරීම කැපී පෙනෙන කාරණයක්.
පොලිස් ඇකඩමියේ අධි ආරක්ෂිත ස්වභාවය තිබියදීත්, සීමිත එළිමහන් පුහුණු කලාපවලට ප්‍රවේශ වීමට බුගාලියා සමත් වීම තුලින් ඇය සතු දක්ෂතාව වඩාත් හොදින් පෙනී යනවා.
ඇතැම් පුහුණු උප පරීක්ෂකවරුන් ඇගේ අනන්‍යතාවය පිළිබඳව සැක මතු කිරීමත් සමගයි බුගාලියාගේ වංචාව හෙළිදරව් වීමට පටන් ගෙන ඇත්තේ.
පසුව මේ පළිබදව ජ්‍යෙෂ්ඨ නිලධාරීන්ට දැනුම් දී ඇති අතර අභ්‍යන්තර පරීක්ෂණයක් ආරම්භ කර ඇත්තේ ඒ අනුවයි.
ප්‍රශ්න කිරීමේදී, බුගාලියා පිළිගෙන ඇත්තේ ඇය ව්‍යාජ අනන්‍යතාවයක් ලබා ගත් බවයි.
සහෝදරියන් හතර දෙනෙකු ඇතුළත් ඇගේ පවුල විශ්මයට පත් කිරීමට පමණක් නොව, පොලිසිය හා සම්බන්ධ බලතල සූරාකෑමට ද උත්සාහ කළ බව ඇය පාපොච්චාරණය කර තිබෙනවා.