හිටපු අමාත්‍ය රාජිත සේනාරත්න රිමාන්ඩ් බාරයට ගැනීමට නියෝග
හිටපු අමාත්‍ය රාජිත සේනාරත්න රිමාන්ඩ් බාරයට ගැනීමට කොළඹ මහාධිකරණ අද නියෝග කළා.
ඒ අද (29) පෙරවරුවේ ඔහුට එරෙහිව මහාධිකරණය හමුවේ විභාග වෙන වෙනත් නඩුවකට අදාලව විවෘත අධිකරණයේ පෙනී සිටිමෙන් අනතුරුවයි.
නඩුව කොළඹ මහාධිකරණ විනිසුරු ලංකා ජයරත්න මෙනවිය ඉදිරියේ කැඳවනු ලැබුවා.
නඩුව කැඳවූ අවස්ථාවේ පැමිණිල්ල වෙනුවෙන් පෙනී සිටි අල්ලස් කොමිසමේ නිළධාරීයා අධිකරණයට දැනුම් දුන්නේ, මෙම නඩුවේ පළමු චූදිත වන හිටපු අමාත්‍ය රාජිත සේනාරත්න මහතා කොලඹ මහේස්ත්‍රාත් අධිකරණයේ ඇති නඩුවකට අදාළව වරෙන්තු ලබා සිටින සැකකරුවකු බවයි.
ඔහු දිගින් දිගටම අල්ලස් කොමිසම හා අධිකරණය මගහැරීම හේතුවෙන් වරෙන්තු නිකුත් වූ බවත් එම නිසා ඔහුගේ මෙම නඩුවට අදාළව ඇප අවලංගු කරන්නැයි අල්ලස් කොමිසම අධිකරණයෙන් ඉල්ලා සිටියා.
විනිසුරුවරිය එහිදී පැවසුවේ චූදිත මහාධිකරණය හමුවේ විභාග වන නඩුව මඟ හැරි බවට අවස්ථානුගත කරුණු මතුව නොමැති බවයි.
එම නිසා මෙම නඩුවට අදාලව රාජිත සේනාරත්නගේ ඇප අවලංගු කිරීම ප්‍රතික්ෂේප කළ අතර කොලඹ මහාධිකරණ විනිසුරුවරිය මහේස්ත්‍රාත් අධිකරණයේ වරෙන්තු නිකුත් වී සිටින හිටපු අමාත්‍ය රාජිත සේනාරත්න මහතා රිමාන්ඩ් භාරයට ගෙන මහේස්ත්‍රාත් අධිකරණයට ඉදිරිපත් කරන මෙන් බන්ධනාගාරයට නියෝග කළා.