හිටපු අමාත්‍ය රාජිත සේනාරතන සැප්. 09 දක්වා රක්ෂිත බන්ධනාගාරගත කිරීමට නියෝග (VIDEO)
හිටපු අමාත්‍ය රාජිත සේනාරත්න සැප්තැම්බර් 9 වන දින දක්වා රක්ෂිත බන්ධනාගාර ගත කිරීමට කොළඹ මහේස්ත්‍රාත් අධිකරණය අද(29) නියෝග කළා.
හිටපු අමාත්‍ය රාජිත සේනාරත්න පෙරවරුවේ ඔහුට එරෙහිව මහාධිකරණය හමුවේ විභාග වෙන වෙනත් නඩුවකට අදාලව විවෘත අධිකරණයේ පෙනී සිටිමෙන් අනතුරුව එම නඩුව කොළඹ මහාධිකරණ විනිසුරු ලංකා ජයරත්න මෙනවිය ඉදිරියේ කැඳවනු ලැබුවා.
ධීවර අමාත්‍යවරයා ලෙස කටයුතු කරන සමයේ මෝදර ධීවර වරාය අඩු මුදලකට පෞද්ගලික සමාගමකට බදු දීම සඳහා ධීවර නීතිගත සංස්ථාවේ අධ්‍යක්ෂක මණ්ඩලය පෙළඹවීම යන චෝදනාව මත තිබූ නඩුව අද (29) මහාධිකරණය හමුවේ කැඳවූ අවස්ථාවේ කොළඹ ප්‍රධාන මහේස්ත්‍රාත් අධිකරණයේ වරෙන්තු ලබා සිටි සැකකාර අමාත්‍යවරයා මහාධිකරණය හමුවේ පෙනී සිටියාය.
අල්ලස් කොමිසම විසින් නඩුකරය අවස්ථාවේදී, කොළඹ මහාධිකරණ විනිසුරු ලංකා ජයරත්න මෙනවියගෙන් ඉල්ලා සිටියේ මෙම සැකකරු කොළඹ ප්‍රධාන මහේස්ත්‍රාත් අධිකරණයේ මේ වන විට වරෙන්තු වී සිටින බවයි.
එම නිසා මෙම සැකකරුගේ ඇප අවලංගු කොට රක්ෂිත බන්ධනාගාර ගත කරන ලෙසට කොළඹ මහාධිකරණ විනිසුරුවරියගෙන් අල්ලස් කොමිසමසම ඉල්ලා සිටියා.
එම ඉල්ලීම ප්‍රතික්ෂේප කළ විනිසුරුවරිය මෙම නඩුකරය සඳහා ඇප අවලංගු කිරීමට තරම් කිසිදු කරුණක් විත්තිකරු විසින් සිදුකොට නොමැති බවත් එලෙස රක්ෂිත බන්ධනාගාර ගත කිරීමට නොහැකි බවත් ප්‍රකාශ කළා.
නමුත් කොළඹ මහේස්ත්‍රාත් අධිකරණයේ නඩුවක් සඳහා මෙම විත්තිකරු වරෙන්තු වී සිටින බැවින්, විත්තිකරුව රක්ෂිත බන්ධනාගාර බාරයේ තබාගෙන කොළඹ මහේස්ත්‍රාත් අධිකරණයට ඉදිරිපත් කරන ලෙස බන්ධනාගාර නිලධාරීන්ට මහාධිකරණ විනිසුරු ලංකා ජයරත්න මෙනෙවිය නියෝග කළා.
ඒ අනුව හිටපු අමාත්‍ය රාජිත සේනාරත්න මහතා කොළඹ මහේස්ත්‍රාත් අධිකරණයට ඉදිරිපත් කිරීමෙන් අනතුරුව ඔහු සැප්තැම්බර් 9 වන දින දක්වා රක්ෂිත බන්ධනාගාර ගත කිරීමට නියෝග කළා.